LEVENSGENIETER

Als je in een gat zit, stop dan met graven...

Geschiedenis

1 reactie

Afgeloape maendag adden ons 'n begraefenis van 'n angetrouwde neef, ie was uut 1933. Ons ebben 'eêle ouwe fermielje docht ik toen ad ik zo us in de rondte keek in de aula. En dat betekent dat er oak vee geschiedenis is. Dit plaetje laet 't graf op 't Ouwland zien, en dae op dat moaie stikje eiland Thoole leggen de wortels van de fermielje Deurloo, en mit eên van die Deurlootjes was Jan getrouwd. Mà z'n eige fermielje kwam oak van 't Ouwland. 

Jan 'ad 'n hobby wae al eêl vee belangstellende mensen van ebbe genote. Ie ei jaeren an jaeren in de weêre gewist mit de geschiedenis van Thoole-Schaekerloo, da's de naem van de 'site' - ebben ons dae 'n Thools woard voa ? Kiek màar us bie www.Tholen-Schakerloo,dan kunnen julder de naemen zien van alle fermieljes die dae geweund ebbe, alle mensen die begraeve legge dae op 't graf, alle boerderieen, affijn, ik noemen 't allemae nie op, julder motten zelluf mà kieke. Gelukkig gae z'n zeune Dave mit alles verder, die wier angestoke mit dat zellufde virus as z'n voader. 

Dae bin ik eêl bliee om. Julder weten allemae dat 't Ouwland en Mesloek diep in m'n arte zit,  oak mit m'n vertelsels. Mà dae ei de wetenschap niks an, die motten waere historie ebbe voa 't naegeslacht. 

Jan is 't er nie meêr, mà z'n werruk bluuf voartbestaen. En netuurluk de herinneriengen an 'm bie z'n vrouwe , kinders en kleinkinders, en alle verdere fermielje.

1 reactie

Je aangetrouwde neef Jan mag het nodige over de geschiedenis van Tholen hebben geschreven, jij draagt daar ook het nodige aan bij. Hulde!

Toos van Holstein

28 November 2021 om 11:40

Plaats een reactie

U bent nog niet ingelogd; hierdoor kunt u nog geen reactie plaatsen.
Ga eerst na de inlogpagina. Als u geen ZeelandNet abonnemenent heeft kunt u een gast-account gebruiken.