LEVENSGENIETER

Respect betekent, met andere ogen kijken. ( Nicci Gerard)

Schouwe

1 reactie

Ons muggen graeg kieke nae die t.v. programma's over ver'uuze, en dan 't liefste van die Engelse series. Droam'uus op 't platteland bevobbeld. Dae kommen dan stellen an bod die op ouwere leeftied d'r eige 'uus verkoape en mit 'n dikke portemenee iemand in'ure om 'n uus voa zulder te zoeken. Dat bin dan eêle groate koten, mit vee grond d'r bie. En dan is 't er oak nog 'n verrassings'uus bie. Vroeger as kind kocht je in de snoepwienkel 'n verrassingszak, je wist noait wat dae in zat, en dikkuls lustten je de 'n elft d'r nie van. 

Da's bie die verrassingsuuzen oak zo, ze kommen binnen, dat koppel ei dan al twee uuzen achter d'r kiezen , en dan motten ze elemae uut d'r dek gaen voa dat leste uus. En dat val soms meraekels tegen, dat zie je an die uutgestreke gezichten. Mà d'r is één opmerkieng die in dat programma eêl dikkuls gezeid oardt  Wat 'n mooie schouw, of open haard! Wè op z'n Engels , dat begripen julder wè. Die schouwe is af en toe zo groat, die beslae soms 't groatste stik van de kaemer, die al niet groat is. 

En dan kommen ze in de keuken, die vinden ze meêstà te klein , ze willen ommes vee versite ontvange. Dan dienk ik, dat willen julder nie, mà die kommen wè, om te kieken wae julder nae toe verkast bin. En de tuin ? Oak nie goed, oak te klein.. En dat op die leeftied! Mensekinders, ons bin na ons apparement ver'uusd omdat de tuin te groat wier. Noe zeg ik dat verkeêrd, die tuin wier nie groater, die was altied zo, mà ons waeren ouwer g'oare, en stiever, en de grond wier te laeg! Af en toe most ik wellus an Boer Koekoek dienke, kennen julder die nog ?, die wou Nederland 'n meter op laete oage, dan oefden de boeren nie meêr zo diep te bukken.

En die Engelse senioren, die vinden de tuin nie groat genogt. Affijn, 't is altied al vreemd volluk gewist. Waerom ons dan toch zo graeg kieke nae die groate schouwen, al die balken en boamen, geweun om 't gevoel te kriegen dat ons slim gewist bin. Dat ons ier lekker an d'Ouwe Werf weune, mit t.v., c.v. en p.v. Laet ze an d'overkant mà lienks rieje en d'r eige uut de naed werruke, ik kan dae uren nae kieke!

1 reactie

Ik kijk ook heel graag naar dat soort programma's. Puur amusement, maar ook heel leuk om na te gaan hoe ik die klus zou aanpakken. In gedachten dan!!

Toos van Holstein

19 May 2021 om 12:55

Plaats een reactie

U bent nog niet ingelogd; hierdoor kunt u nog geen reactie plaatsen.
Ga eerst na de inlogpagina. Als u geen ZeelandNet abonnemenent heeft kunt u een gast-account gebruiken.