
Gistere 'eb ik geên mens uutgetrokke..Voa degene die nie weete wat 'ad dat is, ik 'ebben dus geên foto's gemaekt op de Dialectdag. Dit is 'n plaetje van 'n pae jaer geleeje, toen wier 't er 'n borstbeeld onthuld van mevr. Ghysen, in Domburg. Dat staet 't er nog steeds oe, dat zag ik van de zeumer. Die vrouwe die ei 't Zeeuwse Woardenboek van dialecten saemengesteld, dae ei ze vuuftig jaer vriewillig an gewerkt, en ons ebben dae nog elleken dag plezier van.
Gistere oak weê. Toen vierden de leejen van de Verenigieng in de Vroone in Kapelle dat ons 90 jaer bestaen. En 't was de 43e dag dat we daevoa saemen kwaeme.
Ad ik an Dialectdag dienke, dae kom ik bekant à 30 jaer, dienk altied an bolussen, gries 'aer en an 't Zeeuwse Volkslied. Die bolussen , die kriegen m'n amme binnenkomme, dat grieze aer krieg je van eihus, en dat lied ziengen m'n saemen ad alles klaer is en ons gaen vertrekke.
D'r bin jaeren gewist dat d'r gezonge wier mit pianobegeleiding, af en toe mit 'n gitaar, al nae gelang d'r muzikanten anwezig waere die adden opgetreeje, en de leste jaeren dikkuls 'a capella'. In Kapelle, maeken m'n d'r dan van. Mà, 't is tredisie, en dat mot zo bluuve.
De bieeênkomst woar wè steeds minder bezocht, de leejen bin stik voa stik gepensioneêrd, dus 't verloap is groat. Sommige kunnen bekant nie meêr loape...
Mà m'n ouwen de moed d'r in, net as ons 't volkslied d'r in 'ouwe.
Gistere kregen m'n voa de lunch'n optreden 't oaren van Dingeman de Visser, vroeger van Dunder, en van Jan Zwemer, o.a. bekend om z'n stikjes in de krante. Ze zongen en declameerden versjes, van Wilmink tot Brel, en van Zwemer zelf. Moaie teksten en moaie meziek op de gitaar. Dingeman speelden zellufs nog didgeridoo, op 'n pvc buize. 'k Ebben genote.
An taefel is 't oak gezellig, net 'n kippekot uut alle windstreken van Zeeland.
En 's middags kwam Wim Daniels op versite. Da's toch geên Zeêuw? Nee, mà die kan eel moai vertelle over't dialect van Oast Braebant, ie kom uut Aarle-Rixtel. En die man ei meraekels vee boeken geschre, ie was van de weeke oak nog bie Pauw op de tillevisie, dae 'ebben julder um misschien wè gezien. Mensekinders, wat kan die man vertelle, wat 'ebben ons vee gelache, en gelieks oak nog vee geleêrd. 't Was allemae de moeite waerd.
't Is 't open dat ons d'r kommende jaere weêr bie kunnen weeze...